Шернур район Кучанур ялыште илыше Петуховмыт ешыште усталык шӱлыш озалана. Озавате Ольга Алексеевна «Шернур вел» редакцийыште корреспондентлан ятыр ий тыршен. Кызыт Кучанур клубым вуйлата. Пелашыже Анатолий Андреевич «Северо-восточные тепловые сети» организацийыште слесарьлан пашам ышта. Суртоза – тале мер пашаеҥ.
Анатолий Андреевич ден Ольга Алексеевнан кум икшывышт уло. Кугуракше, Валерия, Шернур посёлкысо 2-шо номеран школын 4-ше классыштыже чыла «визытанлан» тунемеш. Аваж гай артист койышан. Мураш, кушташ, сӱретлаш кумылан. Олимпиадылаште уш-акылжым терга, сочиненийым возымаш да почеламутым сылнын лудмаш конкурслашке ушна. Кокымшо икшыве – Женя. Тудо вич ияш. Шернур посёлкысо «Йомак» йочасадыш коштеш. Машинам, пӱртӱсым сӱретлаш йӧрата. Кидше гыч карандаш, фломастер, чия ден альбом огыт кораҥ. Сӱретче лиеш, очыни. Эн изиже, Катя – ончыкылык мурызо. Сылне семым колешат, муралтен-кушталтен колта.
– Ме жапым еш дене пырля эртараш тыршена. Пӱртӱс лоҥгаште канаш йӧратена. Йоча-влак аттракционыш, кинотеатрыш, театрыш кумылын коштыт. Он-чыкыжым Марий Элысе сылне верлашке экскурсий дене каяш шонымашна уло. Еш – тӱҥ поянлык, илыш эҥертыш. Тек кажне ешыште пиал да йӧратымаш озаланат, – ойлат ача-ава.
