Лач тыге ойлаш лиеш Марий Элын калык артисткыже Светлана Викторовна Сандакова (Ягулбаева) нерген, илышыжым, пашажым шымлен иктешлымеке. М.Шкетан лӱмеш Марий национальный драме театрын артисткыже 22 ноябрьыште «Бавай» спектакль дене бенефисым эртара. С.В.Сандакова дене вашлийын мутланышна.
– Светлана, йоча жап могай шарнымашым коден?
– Мый Морко районысо Шеҥше селаш шочын-кушкынам. Йоча пагыт – эн весела жап илышыштем. Мемнан илыме уремыште иктаҥаш ӱдыр-рвезе-влак моткоч шукын кушкынна. Мый нунын командирышт лийынам. Йошкар ӱпан улмем дене чыла деч ойыртемалтынам. Йочам годым тыгай ӱпем деч моткоч чот вожылынам, ятыр гана шортынам. Тунам шӧртньӧ тӱсан улмемым аклен моштен омыл. Туге гынат йолташем-шамыч мыйым пагаленыт да колыштыныт. Кеч-мо шотышто пытартыш шомак мыйын лийын. Пырля тӱрлӧ концертым ончыктенна, пошкудо яллаш коштынна. Эм шудым погенна, коштенна да аптекыш сдатленна. Мо оҥайже, йоча-шамыч погат да мыланем конден пуат ыле. А мый кӧ мыняр кондымым эре возенам. Школышто сценкым шынденна. Шарнем икымше ролем: Корак лийынам. Шомакшат икте веле ыле, «Кар-р-р-р» манынам. Клуб пеленысе куштымо кружокыш коштынам. Кушташ пеш йӧратенам. Очыни, садланак 11-ше класс деч вара Йошкар-Оласе культпросветучилищыш (кызыт И.С.Палантай лӱмеш тӱвыра да сымыктыш колледж) хореографий пӧлкаш тунемаш пураш кумылаҥынам.
Кугурак лиймеке, индий кином чот йӧратен онченам. Тусо мурыжо, куштымашыже, вургемже, чын йӧратымаш да тудын верч кучедалмаш – чылажат кумылем савырен. Магнитофоным налын, кином ончаш клубыш куржам ыле. Киносо мурсемым кассетыш возен налынам. Йоча годсо шонымашем – Индийым шке шинча дене ужаш – кызытат чоныштем ашнем. Илен-толын, тудо шукталтеш манын ӱшанем.
– Куштызо лияш шоненат гынат, пӱрымаш артист корныш шогалтен.
– Тыге шол. Культпросветучилищыш тунемаш пурен шым керт. Жапым арам йомдараш огыл манын, Моркышто ургызылан тунем лектым. Вара адак чон олашке шупшын, ты тунемме тӧнежышкак. Олег Геннадьевич Иркабаевын вуйлатыме актёр курсышкыжо ушненам. Вара Москошто М.Щепкин лӱмеш кӱшыл театральный училищыште шинчымашым погенам. 1998 ийыште Йошкар-Олашке диплом дене пӧртылынам.
– Коло куд ий жапыште 59 рольым модынат. Икымше ролетым кызытат шарнет?
– Икымше ролем культпросветучилищыште тунеммем годым Марий самырык театрын сценыштыже лийын. «Пӧртыл, ӱдырем» спектакльыште Олян образшым чоҥенам. Тудым нигунам ом мондо, шортын-шортын модынам. Икымше йӧратымаш, ӱшаным йомдарымаш да молат. Шкежат спектакльысе тӱҥ герой дене ик гай ийготан лийынам. Моско гыч тунем толмеке, М.Шкетан театрыште «Ачийжат-авийжат!..» спектакльыште Орикын рольжым пуэныт. Икымше пашам лийын.
– Светлана, ты жапыште тӱрлӧ койыш-шоктышан образым чоҥенат. Кушеч вий-куатым налат? Спектакльласе мут-влакым кузе шарнен кодат?
– Кузе шарнен кодам – южгунам шкежат ӧрам. Кунам модат, шомакым действийышке пыштет, тунам мут-влак шкеак шарналтыт. Рольым модмем годым шинча ончылнем – эре ош кагаз: тушто строка-влакым ужам. Рольым эре, кечыгут тунемам: пашаште, канен шинчыме, сурт кокласе сомылкам ыштыме годым, мален колтымешкем, строка-шамыч ушыштем пӧрдыт. Шомак-влакым шарнымаш – тиде ик сомыл, эше ты мутлан кӧргӧ шижмашым (эмоцийым) келыштарыман. Икманаш, моткоч неле паша. А тудым мый шке ойырен налынам. Йӧратыме пашашкем кече еда куанен вашкем.
Людмила ГРИГОРЬЕВА мутланен.
Снимкыште: Светлана Сандакова – Алексей пелашыже, Валерия, Элавий, Аксар икшывыже-влак дене пырля.
Фотом еш архив гыч налме
