Надежда Андреевна Горохова Медведево посёлкышто ешыж дене ила. Тудо кидпашалан моткоч кумылан.
– Икымше пашам сур тӱсан носки лийын. Тудым кок арня пидынам. Вет йоча годым тыгай сомыл нелырак чучын. Рончаш да уэш тыршашат логалын. Но ямде пашамым ужмеке, чот йывыртенам. Ковамат, кумылаҥден, тыгерак ойлен: «Мый тиде носким шондык пундашыш пыштем да кажне гана куанен ончаш тӱҥалам». Тыгай мут деч вара кидпашалан чон шупшын утларак. Школ жапыште шканем тӱрлӧ вургемым: кужу юбкым, жилеткым, кофтым, костюмым – пидын чиенам, – ойла Н. Горохова.
Эн йӧратыме тувыр
Надежда Андреевнан кидыштыже крючок модеш веле. Сӧрал да ойыртемалтше вургемжым ончен куанет. Тӱрлӧ тӱсан кофтым, пальтом, упш ден шарф наборым ужмек, чылажымат чиен ончымо шуэш. Йӱдвел кундемыште пашам ыштымыж годым пийланат чиемым ямдылен.
– Чонлан келшыше вургемым мый пеш вашке пидам. Размер шотышто гына нелылык лектын кертеш. Ик пашам дене кызытат кугешнен илем. Кугурак ӱдырем, Светлана, марлан каяш тарванымыж годым ойыртемалтше тувырым шкаланже кычалын. Тыге пидме сӱан тувырым интернетыште ужын да мыланем ончыктен. Икмыняр жап шонкалымек, тыгайым пидаш келшенам. Тыглай чием огыл да моткоч тургыжланенам. Фасон ден размерымат чын да мастарын келыштараш кӱлын. Тылзат пеле жапыште ямдылен шуктенам. Тиде тувыр мыланем да ӱдыремлан моткоч келшен. Родо-тукымат, пошкудат ӧрын онченыт да моктеныт. Кызытат аралена. Жапын-жапын луктын ончена, – палдара кидмастар.
Ӱдыржымат кумылаҥден
Уста да чолга ава ӱдыржымат пидаш шӱмаҥден. Светлана утларакшым модышым ышташ йӧрата. Курчакше могай гына уке! Изирак ӱдыржӧ, Екатерина, модель семын полша. Пидме вургемым чиен, калык ончыко лектеш. Ӱдыр-влак кидпаша лектышыштым фотош войзат да соцсетьыш луктыт.
Шукерте огыл Надежда эше ик у пашалан тунем шуын. Мӧҥгыштыжӧ тӱрлӧ тортым ышта.
– Эн ончыч интернетыште келшыше рецептым кычалам. Ямдылымеке, лишыл еҥем-влакым сийлем, вара гына ужалымашке луктам. Кугурак пайремыш да сӱаныш «Молочная девочка» ден «Красный бархат» тортлам налыт. «Унала кинде деч посна огыт пуро», – маныт калыкыште. Мый еҥ деке эре шке ыштыме тортым намияш тыршем, – каласкала Надежда.
Уста еҥ дене вашлияш, пашаштым ужаш – кугу пиал. Шке кид дене пидме вургем поснак мотор да ойыртемалтше.
Дарья БЫКОВА.
