Мый Провой кундем Красногорский посёлкышто 2-шо номеран школышто тунемам. Кумшо классыш вонченам. Мураш «Теремок» йочасад гычак кумылаҥынам. «Изи шӱдыр» йоча ансамбльыш коштам. Коллективыште кудытын улына. Мыланна тӱрлӧ мероприятийыште участвоватлаш келша. 2022 ийыште «Пеледше тукым» ренспубликысе конкурсын районысо йыжыҥыштыже «Кече йол» муро дене икымше верым налынна. 2023 ийыште Республикысе «Самырык тукым» йоча усталык республикысе конкурсышто «Семлык» номинацийыште диплом дене палемденыт. Тиде ийынак Йошкар-Олаште эртаралтше «Пятый элемент» тӱнямбал фестиваль-конкурсышто да тыгак «Идалыкысе муро — 2023» фестивальыште сеҥышыш лектынна.
Тений «Вечные песни у Кремля» патриотический муро фестивальыште «Изи шӱдыр» ансамбльлан сертификатым кучыктеныт. Пеледыш пайремыште, Памашсола ял пайремыште да моло вере муренна.
Муро шочмо йылмым, йӱлам аралаш, аклаш, йӧраташ кумылаҥда. Марий йылме ден сем моткоч ныжыл улыт.
Дарья ИЗЫЧЕВА.
