Марий калык кидпашаж дене ожнысек ӧрыктарен. Ӱдырамаш, ӱдыр-влак тӱрым тӱрленыт, вынерым куэныт гын, пӧръеҥ-шамыч воштыр гыч арверым тодыныт, пу гыч ӱзгарым ыштеныт. Звенигово районысо Мастарлык пӧртыштӧ кидпашалан кызытат шуко жапым ойырат. Тушко пурымеке, ончерыш логалмыла чучеш. Марий вургем, шке гыч ыштыме арвер, сувенир-шамыч улыт. Мастарлык пӧртын кажне ужашыше ойыртемалтше ӱзгар дене темын. Кидпашам ончен, чон куана.
Куд мастар
Мастарлык пӧртыштӧ кудытын пашам ыштат. Вуйлатышышт – Г.Р.Кудрявцева. Кидмастар-влак самырык тукымын кумылжым усталыкышт дене савырат. «Лоза», «Чудеса в решете», «Живая старина», «Умелец» кружок-влак пашам ыштат. Марий калык тӱр студий уло. Тышке толшо кажне еҥ чонлан келшыше сомылым ойырен кертеш.
– Ме ленте дене тӱрлена, фоамиран, гофрированный кагаз гыч тӱрлӧ пеледышым ыштена, сувенир-влакым ямдылена. Кружокыш кугыеҥ-влак веле огыл, йоча-шамычат коштыт. Кова, ава-влакым ончен, пашалан тунемыт. Кызыт марий сынан пӧлекым У ийлан ямдылена, – ойла «Умелец» кружокым вуйлатыше Галина Родионовна.
Юзо чинче пырче
«Чудеса в решете» кружокыш шер пырче дене пидаш тунемаш кумылан-влак кажне шуматкечын вашкат. Ӱдыр-шамыч коклаште ик рвезе уло. Ты кружокым И.В.Чугунова шым ий ончыч чумырен.
– Мый кидпашалан изинек шӱман улам. Яра жапыште тӱрлем, тошто арвер-влакым ачалем. Кажне гана ойыртемалтше лийже манын тыршем. Тидлан йоча-шамычым туныктем. Ончыч шке икшывем, тыште пашам ыштыше-шамычын йочаштым кумылаҥденам. Пашаштым поген, ончерыш чумыренам. Ончаш толшо йоча-влак коклаште пидаш тунемаш кумылан-шамыч ятырын лийыныт. Тыге «Чудеса в решете» шочын. Кызыт кружокыш латкумытын коштыт, – ойла Ирина Валерьевна.
Нине ӱдыр-влакын кидыштышт изи, йылгыжше чинче-шамыч тӱрлӧ сӧрал арверыш савырнат. Кидшолым, пеледышым, брошкым да молымат пидыт. Кажне йоча шке шонымашыжым арвер гоч почын ончыкта. Тыге нуно моторлыкым кумданрак ужаш тунемыт.
Марий калык тӱр студий
«Живая старина» кружокышто гладь дене тӱрлат гын, марий калык тӱр студийын тӱҥ пашаже калык тӱвырам, фольклорым арален кодымаш. Самырык-влакым йӱла дене палдарат, марий тӱрын вийже, ойыртемже нерген умылтарат, тӱрлаш туныктат. Ожнысо тӱрым ончен, тачысе кечылан келыштарат.
Кажне кружок, студий лектышышт дене куандарат. Йоча-влак тӱрлӧ конкурсышто сеҥышыш лектыт.
