1 июньышто Марий Эл Республикысе самырык-влакын полатыштышт «Йоча тӱня» пайрем лийын. Тудым Республикысе марий тӱвыра рӱдер эртарен. Пайремышке Йошкар-Оласе, Шернур, Кужэҥер, Советский, Волжский, Медведево районласе школла гыч тунемше-влак ушненыт. Нуно ий мучко марий йылмым, сылнымутым тунеммаште, марий калыкын тӱвыражым, эртыме корныжым шымлымаште кугу кӱкшытыш шуыныт, усталык конкурс ден фестивальлаште ойыртемалтыныт.
Агытан, Тарля, смурфик-влак тӱрлӧ модыш дене модыктеныт. Йоча-влак марла куштеныт, икте-весышт дене палыме лийыныт. Поезд дене кеҥеж аланышке кудалыныт. Тӱрлӧ «остановкышто» шогалын, йомакысе герой-влакын йодмыштым шуктеныт: сылне муро почеш совым кыреныт, юарлен тӧрштылыныт, Тарля дене пырля самолёт дене «чоҥештеныт» да пӧлек аланышке логалыныт. Пӧлекым налмеке, ӱдыр-рвезе-влак эн вучымо унам, Кеҥежым, шокшын вашлийыныт да куаным кондаш йодыныт. Кеҥеж пелен Кече толын, да нуно йоча-влакым концертышке ӱжыныт.
Пайремым Советский район Ӱшнӱр школ гыч «Мурсем», Йошкар-Ола гыч «Падыраш», «Онар», «Шокто, гармонь» ансамбль-влак сӧрастареныт. Уста ӱдыр-рвезе-шамыч кумдан палыме мурызо-влак З.Берникова, С.Осипова, В.Матвеев, Р.Искакова дене пырля марий муро-влакым йоҥгалтареныт.
Пайремым «Юзо шӱвыроҥ» шовын шоу мучашлен.
