Уремыште, корнышто шкем чын кучымо шотышто ача-ава-влак йоча-шамычлан изинек умылтарышаш улыт. Икмыняр правилым ньога йочасадыш коштмыж годымак ушышкыжо пыштышаш. Российысе элгӧргӧ паша министерствын Морко районысо полиций отделжын старший участковый уполномоченныйже майор С.О.СМИРНОВ дене корнышто коштмо правил-влак нерген мутланышна.
– Ача-ава йоча дене модмо але йочасадыш, школыш ужатыме годым корно правил-влак нерген примерлам кондат, тӱрлӧ знакым ончыктен ушештарат гын, икшыве писынрак шарнен кодеш. Корнышто тӱткӧ лийме нерген кажне йоча палышаш да лӱдыкшыдымылык нерген шарнышаш. Корным лӱмын келыштарыме верыште кок могырыш ончалын вончыман. Тротуар дене ошкылман. Ролик коньки, скейтборд дене корно воктене кудалыштман огыл. Шарныза: машиналан кудалышташ келыштарыме корно модаш ышталтын огыл.
– Сергей Олегович, тӱшка транспорт гыч лекме годым мом шарныман, айста ушештарена.
– Автобус але вес транспорт гыч волымеке, ончыкыжо нигунам куржын ида лек. Кудал толшо вес машина уке гын, корным вончаш лиеш. Каласен кодем: тӱшкан коштмо годымат тӱткӧ лийман. Колонно дене шогалын, ик могырышто ошкылман. Тротуарыште вер шагал гын, корно тӱрыш изиш лекташ лиеш (но пычкемышыште огыл). Йолешке корнышто эре шола велым ошкедышаш. Колонно ончылно да шеҥгелне 10-15 метр тораште кугыеҥ-влак йошкар тисте дене кайышаш улыт. Касеш кодмо годым вургемыште светоотражатель лийшаш.
– Йоча-влак кеҥежым уремыште шукырак коштын кертыт. Законым пудыртышо-влак садиктак мутым кучат?
– Тунемме жапыште «комендант шагат» 22 шагат марте лийын гын, кеҥеж жаплан ик шагатлан кужемденыт. Ийготыш шудымо йоча-влаклан 23 шагат деч вара ача-ава деч посна тӱшка верлаште (стадион, сквер, парк, кафе, кевыт да молат) кошташ ок лий. 18 ийым темыдыме ӱдыр-рвезе-влак законым пудыртат гын, правам аралыше органын еҥже-влак полиций пӧлкаш наҥгаят. Кӧ да кушеч улмым рашемден огыт керт гын, лӱмын келыштарыме тӧнежыш колтат.
