Серызе Аркадий Степанович Крупняковын шочмыжлан 105 ий темме лӱмеш Советский посёлкысо рӱдӧ книгагудышто лудмаш конкурс эртаралтын. Тушко школ гыч ныл тунемше миен. Мемнам ялысе книгагудын вуйлатышыже Людмила Николаевна Мочалова ямдылен. А.С.Крупняков ятыр темылан почеламутым возен. Мый сар нерген почеламутым лудынам. Кыртмен ямдылалтмына арам лийын огыл: Виолетта Трифонова ден коктын сеҥыше-влак радамыш лектынна. Ачажым шарналташ Аркадий Степановичын эргыжат толын, поро шомакым ойлен. Тугеже Аркадий Крупняков огеш мондалт, калык чонышто ончыкыжат илаш тӱҥалеш.
Юля ЯГОДАРОВА.
Советский, Кельмаксола.
