Шукерте огыл кугу элнан рӱдолаштыже лияш пиал шыргыжалын. «Шочмо кундемысе самоуправленийын эртыме корныжо» всероссийский конкурсышто мастарлыкем тергенам. Тушко Российын 79 регионжо гыч 863 чолга ӱдыр-рвезе погынен. Эн кугу делегаций Ленинград, Оренбург кундемла гыч лийын. Мый шкенан ял староста Виталий Николаевич Мосолов нерген каласкаленам. «Верысе самоуправленийын лидерже» таҥасыште кумшо верыш лектынам. Моткоч чот куаненам! Снимкыште пашамын вуйлатышыже, авам З.В.Небогатикова дене пырля улына.
Конкурс деч вара ВДНХ-те «Россия» форум-ончерыште, Измайловский Кремльыште экскурсий дене лийынна, кастенысе Моском онченна. Чылажат келшен да поро шарнымашым коден.
Родион НЕБОГАТИКОВ.
У Торъял, Токтарсола.
