Йоча газетыште тыршыше-шамычлан икшве-влак дене вашлиймаш кеч-кунамат куанле. Ме, «Ямде лий» газет редакцийын пашаеҥышт, школлаш чӱчкыдын лекташ тыршена. Черетан вашлиймаш Медведево районысо Цибикнур школышто эртаралтын.
Школышто 76 ӱдыр-рвезе тунемеш. Вашлиймашке 1-5-ше класслаште тунемше-шамыч погыненыт. Чаманен каласыман, кеч южышт марла умылат гынат, икте-весышт дене утларак рушла кутырат. Туге гынат, «Салам» да «Поро кече» манмышт моткоч шергын чучын.
Актовый залыште погынен, ме йоча-влакым «Ямде лий» газет да тудын пашаж дене палымым ыштенна. Куандара, Цибикнур школышто ты газетым налше-влак улыт. Вашлиймаш оҥайын эртыже манын, кажне гана модыш йӧным кучылтына. Ты гана йоча-влак ребуслан вашмутым кычалыныт, ик кужу шомакысе буквалам кучылтын, кӱчык мут-шамычым шоненыт. Тӱшка дене пашам ыштымаш ӱдыр-рвезе-влаклан келшен. Тыгай модышла уш-акылым пудыратат, йылмым пойдарат. Рома Кудрявцев, Лиза Моргунова да Настя Старикова почеламутым сылнын лудмышт дене куандареныт. Эн чолга-влаклан пӧлекым кучыктенна. Ӱшанена, вашкылна эшеат пеҥгыдырак лиеш.
