Йошкар-Олаште, Бауман лицей пеленысе «Лира» йоча сымыктыш школышто, «Руки сердечное тепло» регион-влак кокласе инклюзивный фестиваль-конкурс латикымше гана эртаралтын. Тушко Российысе тӱрлӧ регион да ола гыч изинек эмганен кушшо 600 наре йоча ден самырык еҥ погынен.
Ӱдыр-рвезе-шамыч усталыкыштым тӱрлӧ номинацийыште ончыктеныт: мурымаш, куштымаш, семӱзгар-влак дене шоктымаш, почеламутым лудмаш, сӱрет ден фотографийым ыштымаш, мультфильмым ямдылымаш. Сымыктыш школын пашаеҥже-шамыч самырык тукымлан ончерым келыштареныт, тӱрлӧ теме дене мастер-классым эртареныт. Ӱдыр-рвезе-влакын усталыкыштым ийготым шотыш налын акленыт. Теве Звенигово район Кожласола гыч Карина Ватютова (Изи Карина) ий еда ты таҥасымашке ушна. Теният шке ийготан-влак коклаште Гран-при дене палемдалтын. Саламлена! Тек фестиваль ончыкыжымат шӱм-чоным ырыктыше шарнымашым кажне участниклан пӧлекла!
Катя СЕРГЕЕВА ямдылен.
Фотом «Лира» йоча сымыктыш школын архивше гыч налме.
