«Ямде лий» газетыште республикысе чолга ӱдыр-рвезе-шамыч нерген шуко материал, ушакылым пудыратылаш таратыше модыш-влак да молат савыкталтыт. Йочан сылнымут саскажым иквереш чумыра, увер тӱняш омсам почеш. Марий сылнымут деке шӱмаҥше, калыкын илышыжым, тӱвыражым эскерыше да ончыкылыкшо верч тургыжланыше икшыве шочмо йылме дене савыкталтше газетым лудшашак. Теве Звенигово район Чакмарий школышто 5-ше «А» классыште тунемше-влак лач тыгай улыт. Нуно газет дене кылым кучат. Кажне арнян лудыт веле огыл, газет лаштыклам заметкышт дене пойдарат.
– «Ямде лийым» уло класс дене налына. Ончыч увер-шамычым шергалына, вара кандашымше лаштыкысе заданий-влакым пырля ыштена. Газет тӱжвал тӱсшӧ, возымо материалже-шамыч денат куандара, кидыш налын лудаш кумылаҥда, – ойла Снежана Иванова (снимкыште – шола гыч икымше).
Оля МАЙКОВА.
Авторын фотожо.
