Башкортостан Республикыште «Зарница 2.0» всероссийский сарзе-патриотизм модмаш эртаралтын. Тушко Юл кундем федерал округ гыч 150 наре участник ушнен, чылаже — 14 команде.
Спорт таҥасымаште Марий Элын чапшым Волжск оласе А.С.Пушкин лӱмеш 9-ше номеран школын «Родина» сарзе-патриотизм клубын участникше-шамыч (снимкыште) араленыт. Ӱдыр-рвезе-влакын арня мучко тыршымышт арам лийын огыл. Команде тактический модмаште сеҥышыш лектын, пасуш лекмаш (полевой выход) этапыште ойыртемалтын. Военкор-влак кокласе таҥасымаште Эвелина Чучкалова икымше верым налын.
Патриотизм шӱлышан ӱдыр школ илышыштат шкенжым чолган ончыкта, сайын тунемеш, кушташ кумылан, книгам лудаш йӧрата.
— Дисциплине уло гын, чыла шукташ лиеш. Мый, мутлан, эр кынелам, куржталам, малашат жапыште возам. Воткыллаште шагал шинчем, яра жапем пайдалын эртарем, — ойла Эвелина.
«Зарница 2.0» модмашын финалже сентябрьыште Волгоград олаште лиеш.Ӱдыр-рвезе-влаклан туштат кугу кӱкшытыш шуаш тыланена.
Оля МАЙКОВА.
Фотом школ Архив гыч налме
