У Торъял район Токтарсола гыч Яна ден Лев Небогатиковмыт изинек шкеныштым тÿрлӧ таҥасымаште тергат. Усталыкыштым мурымаште, куштымаште ончыктат, сылнымутлан шÿмаҥын кушкыт.
– Мыланем почеламутым сылнын лудаш утларак келша. Тидлан марий йылмым туныктышем Любовь Васильевна Мочаева кумылаҥден. Тудо келшыше произведенийым ойыраш полша да сылнын лудаш туныкта, – ойла Лёва. – Сценыш лекше йоча шкенжым пеҥгыдын кучышаш, лÿдмыжым, вожылмыжым шылтен моштышаш. Тыге веле авторын шонымашыжым кажне ончышо деке намиен шукташ да сай лектышыш шуаш лиеш.
Тений Лев «Онарын уныкаже-влак» республикысе спорт таҥасымаште кокымшо верым, «Яналов лудмаш» республикысе естественно-научный конференцийыште икымше верым налын. Шукерте огыл шÿжарже дене «Колумб лудмаш» регион-влак кокласе сылнымут да мурсем фестиваль-конкурсыш миен коштыныт. Кажныже шке ийготан-влак коклаште кумшо верыш лектын.
Ӱдыр-рвезе чолга койышан, марий шÿлышан, тÿвырам аралыше, калыкым пагалыше ешыште кушкыт.
– Мероприятийлан ямдылалтмаште кугу тÿткышым ача-авана, коча-кована ойырат. Нуно шкештат тÿрлӧ конкурсышто усталыкыштым ончыктат, мемнамат пеленышт налыт. Еш дене ушнымо таҥасымаште чÿчкыдын сеҥыше радамыш лектына. Тидыже «Пырляште – вий» калыкмутым пеҥгыдемда, – ешарыш Яна. Шукерте огыл Небогатиковмыт «Идалыкын ешыже» республикысе конкурсышто «Йÿлам аралыше еш» номинаций дене палемдалтыныт.
Яра жапыште Лев ден Яна мӧҥгысӧ сомылым шукташ, шудым ямдылаш полшат, кÿтÿм кÿтат, емыж-саскам погат, Николай ден Илья шольышт-влак дене модыт. Тыгак нуно «Это у нас семейное» всероссийский конкурсыш ушненыт. Таҥасымаш радамыште Небогатиковмыт еш спорт модмаште вийым тергаш, поро пашам ышташ да вес заданийлам шукташ тÿҥалеш.
Оля МАЙКОВА.
Авторын фотожо.
