Мый кажне шуматкечын урок деч вара Йошкар-Олашке чон йӱлен вашкем. Тушто мыйым йӧратыме тренерем вуча. Художественный гимнастике дене тренировкыш коштам. Молан спортын лач тиде видшым ойыренам? Икана телевизор дене художественный гимнастике дене эртаралтше таҥасымашым онченам. Ик ӱдырым куанен эскеренам. «Мыят тыге ом керт мо?» – шоналтенам. Ача-авамлан шонымем каласенам. Нуно тореш лийын огытыл. Шочмо ял деч рӱдола марте шӱдӧ утла километр гынат, нимыняр ом ӧкынӧ. Таҥасымаште усталыкем тергенам (снимкыште). Шке ийготан-влак коклаште сеҥыше-шамыч радамыш лектынам да моткоч куаненам. Ончыкыжымат тыршаш тӱҥалам.
Олеся ПЕТРОВА.
Морко, Коркатово.
Фотом еш архив гыч налме.
