Марий кугыжаныш университетын историй да филологий факультетше 9-11 класслаште тунемше-влаклан «Молодое перо» республикысе медиатекст конкурсым кажне ийын эртара. Ты ганат тӱрлӧ теме почеш шонкалымашан сочиненийым возаш кӱлын. Самырык возкалыше-влак шке шонымашыштым келгын, устан почын пуэныт. Иктешлымаш почеш, икымше верым Звенигово районысо Кужмара кыдалаш школышто 9-ше классыште тунемше Анна Кольцова, Медведево кыдалаш школышто 10-шо классыште тунемше Юлия Белянина да Йошкар-Оласе 24-ше номеран кыдалаш школышто 11-ше классыште тунемше Надежда Норкина сеҥен налыныт. Ончыл верыш лекше-влакым диплом да пӧлек дене палемденыт.
Фотом «ВКонтакте» соцкылысе «Истфил» тӱшка гыч налме.
