13 августышто Килемар район Арде селаште «Кугезе мланде» всероссийский фольклор да этнографий фестиваль-форум эртаралтын. Пайремышке Марий Эл, Татарстан, Чуваш республикла, Угарман, Виче кундемла, Ямал-Ненец автоном округ да моло регионла гыч кум тӱжем утла уна погынен. Кугыеҥ-влак коклаште самырык тукымым ужаш куанле лийын. Калык арвер да сымыктыш ярмиҥга калыкым куандарен. Спорт, мурымо, куштымо, модыш площадке-влак пашам ыштеныт. Кумылан-шамыч куымо станыште мастарлыкыштым тергеныт, ненчен, кӱнчылам шӱдырен онченыт.
Э.Сапаев лӱмеш Марий кугыжаныш опер да балет академический театрын артистше-влак «Акпатыр» икымше марий оперым кава йымалне ончыктеныт.
Л.НИКОЛАЕВА ямдылен.
Фотом интернет гыч налме.
