9-14 августышто Мордовий Республикысе Саранск олаште «Большая перемена» всероссийский конкурсын полуфиналже эртаралтын. Тушко 8-10-шо класслаште тунемше тӱжем утла ӱдыр-рвезе ушнен. Кажне кече мероприятийлан, вашлиймашлан поян лийын. Йоча-влак «Вертушка общения» деловой модышышто икте-весышт дене кылым муын мошташ, кутыраш тунемыныт. Кейслан чын вашмутым кычалыныт, тӱрлӧ теме почеш чон почын кутыреныт. Экскурсий дене тӱрлӧ вере коштыныт, мордва калыкын тӱвыраж нерген пален налыныт.
Полуфиналист-влак коклаште Морко район Коркатово лицей гыч Аделя Герасимова, Валерия Саина, Анастасия Петрова да Эдуард Кузьмин лийыныт (снимкыште). Тидын нерген Аделя дене мутланышна.
– Конкурс нерген туныктышем Валентина Николаевна Васильевалан кӧра пален налынам. Полуфиналышке логалаш манын, кужу корным эртенна. Икымше йыжыҥыште шкенан нерген эссем возенна, видеовизиткым ямдыленна, тестым ыштенна. Вара команде дене таҥасенна. Кейслан вашмутым пуэнна, проектым возенна. Мый «Музейный десант» направленийым ойырен налынам. Проектем «Музей Казакова+мы = сохранение истории малой Родины» маналтеш. Тиде моткоч оҥай да кӱлешан теме, шонем. Тыгодым, тӱрлӧ материал дене пашам ыштышыла, шуко ум пален налат. Валентина Николаевналан таум ойлем. «Кугу перемене» вияҥаш кугу йӧным пуэн, – ойла чолга ӱдыр.
«Кугу перемене» – кугу йӧн
