Тӱнямбалне тӱкыдымӧ мланде, чодыра, яндар вӱд, янлык ден кушкыл-влак ий гыч ийыш шагалемыт. Нуным арален кодымаште заповедник-шамыч тыршат. «Кугу Какшан» заповедник ты шотышто кугу сомылым шукта. Тудлан тений кумло ий темын.
– «Кугу Какшан» канде шӱртан эҥер дене тӱрлымӧ нимучашдыме ужар шартышым ушештара. Тудо Килемар да Медведево районлаште верланен. Кумдыкшо – 21428 гектар. Нугыдо чодырам верын-верын куп, олык алмаштат. Кугу Какшан эҥер – заповедникын вӱргорныжо. Тыште тыгак Шушъер, Кошеер, Капсино ер-влак улыт, – ойла вуйлатышын экопросвещений да познавательный туризмым вияҥдыме шотышто алмаштышыже О.В.Грудцына.
«Кугу Какшаныште» могай гына янлык, кайык, шукш-копшаҥге, кушкыл, поҥго уке?! Шуэн вашлиялтшат ятыр. Тиде комаголя, вӱдкома, урымдо, йошкаршашке, кожгупшӱльӧ, курыкышто илыше вырляҥге, изи юмынтага, ошсаҥга, йошкар лудо, купысо сфагнум, шургопшаҥге, порсынлыве, пужгавоҥго да ятыр молат. Нуным Йошкар книгашке пуртымо. Ойыртемалтше янлык-влакын илышыштым эскераш фотоловушко полша. Видеош енот пий, шурмаҥше, эҥер кома да молат логалыныт.
Йоча ден кугыеҥ-влаклан пӱртӱсын моторлыкшым эскераш тунемаш, тудым шымлаш да аралаш тӱрлӧ квест, конкурс, акций полшат. Йочасадыш коштшо-шамыч «Медвежонок – символ заповедника» усталык конкурсышко ушнат. Шко-лышто тунемше-влак «Мир заповедной природы» сӱрет конкурсышто мастарлыкыштым ончыктат. «Заповедная поляна», «Заповедная тропинка» квестлаште янлык, кайык, кушкыл нерген йодыш-шамычлан вашештат, тӱрлӧ заданийым шуктат. Пӱртӱс лоҥгаште еш дене канаш экокорно-влак йӧным ыштат.
Заповедникын лӱмгечыжлан пӧлеклалтше «Большой Кокшаге – 30» акцийым соцкылыште шукерте огыл увертареныт. Тудо идалык мучко шуйна. «Кугу Какшанын» лӱмгече идалыкше тӱрлӧ мероприятийлан, конкурслан, акцийлан поян лиеш. Йоча-влак, теат ушныза.
