«Немда эҥер дек, Чумбылат кундемыш
Ме илыш йӱштым шижын вашкена.
Эшполдо, Ямакай, Пивлат уремыш
Ӱжеш кугезына дек вашкылна…», –
тыгай шомак-влак йоҥгат Кукнурын чапмурыштыжо. Коеш, калык эртыме корныжым жапла, еҥже-шамычым пагала, пӱртӱсшым йӧрата. Тидыже Кукнур кыдалаш школ пеленысе тоштерыш пурымекат палдырна. Тудым С.Н.Конаковын вуйлатымыж почеш 2018 ийыште почыныт.
Икымше пӧлем пӱтынь марий калыклан чапланыше А.Ф.Конаков, И.И.Россыгин, К.А.Четкарёвлан пӧлеклалтын. Кокымшо пӧлемыште марий калыкын илыш-йӱлаж дене кылдалтше экспонат-шамычым чумырымо. Умбакыже – школ, Кукнур кундем нерген увер-влак.
Тоштерын ойыртемже – барельеф технике (сӱрет пырдыж гыч изиш лектын шога) дене сӧрастарыме пырдыж. Тудым верысе кидмастар В.П.Алгаев ыштен.
Кукнур кундемыште лиймеке, школ тоштерым ончалын савырныманак.
Оля МАЙКОВА.
Авторын фотожо.
