У Торъял район Элембай селасе Шукшанский заставыште «Воины духа» богатырский турнир эртаралтын. Тудо Куликов кредалмашлан 640 ий теммылан пӧлеклалтын. Реконструктор-влак богатырский кредалмашын ойыртемжым ончыктеныт, казак-шамыч фланкировко (йӱштӧ оружийым кучылтмаш) дене палдареныт. Куликов кредалмаш нерген каласкаленыт. «Воскресение» кычалше отрядын боецше-влак Кугу Ачамланде сар годсо ӱзгарым, формым ончыктеныт.
− Участник-влак чонышт дене богатырский курымыш кусненыт. Коло еҥан кок команде лийын. 4-7-ше классыште тунемше рвезе-влак лу тӱрлӧ таҥасымашыште вийыштым тергеныт. Турнирлан реквизит-влакым мемнан коллегына Игорь Ожиганов ямдылен. Тиде сеҥымаш, икоян улмо, йӱлам жаплыме пайрем лийын, – ойла «Двуглавый орёл» обществын регионысо пӧлкажын председательже Алексей Сердюков.
