Нылымше урок пытыш. Весылан ямдылалтына. Воктекем Вачий лишеме да йодеш:
– Тӱняште кӧ эн виян, палет мо?
– Айдеме, – вашештышым.
– Уке….
– Айдеме деч виянрак мо уло? – ӧрын йодам.
Мутланымашна уло классым авалтыш, чыланат ӱчашаш пижыч.
– Лев, – пелештышМиклай.
– Маска! – кычкырале Маша.
– Уке, тудо огыл. Носорог эн виян, – ойла Йогор.
– Ойлыштат. Могай носорог? Эн виян слон, – мане Вачий.
Вачийын вашмутшо чылалан келшыш, а мый умбакыже ӱчашымашым шуйынем. Тудым сеҥаш кӱлеш!
– А мый слон дечат вияным палем, – маньым.
– Лийын ок керт! – ӱчаша Вачий.
– Эше кузе кертеш! От ӱшане?
Мемнан йыр ӱдыр-рвезе-влак погынышт. Нунылан оҥай: кӧ сеҥышыш лектеш?
– Слон деч виянже мо вара? – йодо Вачий.
– Тӱткын колышт, ӱмырет мучкылан шарнен код. Слон деч виянрак кум слон улеш!
Вячеслав СМИРНОВ.
