Виче кундемысе Марий тӱвыра рӱдерым Е.П.Афанасьева 16 ий вуйлата. Пыжанью район Вӱлэҥер ялыште верланыше полатыште кум йоча коллектив уло. Иктыже – «Шонанпыл» куштышо ансамбль. Тудо 2020 ий гыч пашам ышта. Визыт гыч кандаш ияш марте лу икшыве коштеш. Изи артист-шамыч концертлаште вич тӱрлӧ куштымаш дене калыкым куандарат.
– Самырык тукымым шочмо калыкын сылне семжылан, мурыжлан, куштымашыжлан изинек кумылаҥдаш тыршена да тиде пашалан кугу тӱткышым ойырена, – ойла коллективын вуйлатышыже Елена Петровна. – «Шонанпыл» ансамбльын кажне участникшын усталыкше нерген кугешнен ойлаш лиеш. Кум ий жапыште икмыняр сеҥымашке шуынна. Областьысе, регион-влак кокласе да моло мероприятийышкат кумылын ушнена. 2022 ийыште «Дебют» II тӱнямбал тӱрлӧ жанран конкурсышто «Вич пар» куштымаш дене 2-шо степенян лауреат лӱмым сеҥен налынна. Кодшо ийын декабрьыште Москошто «Я в искусстве» VIII тӱнямбал сымыктыш конкурсышто 1-ше степенян лауреат лийынна.
«Шонанпыл» ансамбльлан умбакыжат сеҥымашым тыланена.
З.ТИМОФЕЕВА.
