Марий кундемысе кажне гаяк районын шке патырже уло. Советский районын геройжо – Кундыш Кугыза. Лишыл жапыште марий патыр дек у турист корно почылтшаш.
Кундыш эҥер воктенысе вершӧр легендылан да ҥай историйлан поян. Тораштак огыл Кундыштӱр ер верланен. Легенде почеш, ожно тыште кугу тумо ден писте шогеныт. Тушко Кундыш Кугыза ден Чачавий уныкаже кумалаш коштыныт: тумо дек – сӧй деч ончыч, писте дек – сонарыш кайыме але кугу пашам тӱҥалме деч ончыч. Кундыш Кугызан колымекыже, уныкаже чот ойгырен, йўксыш савырнен да шортын чоҥештылын. Шинчавӱд йогымо верыште ер лийын. Кундыш Кугызан мотор вершӧржым Илыше вӱд памаш сылнештара. Лач ты вӱдым подылын, ожно патыр тале кредалмаш деч вара вийым налын.Кызыт Роҥго села деч тораштак огыл, Кундыш эҥерын эн кӱкшака верыштыже, шогалтыме кугу кӱ Кундыш Кугыза нерген шарныкта. Лач ты верыште тудым кӱштен кодымыж почеш тоеныт улмаш.
В.ГОРОХОВА.
