Куржталын, сеҥымашке шуэш

Волжск оласе лицейын тунемшыже Дима Тимофеев  «Спорт – тиде илыш. Ик гана кылым кучет гын, чарнаш ок лий» манеш. Чолга рвезе дене «Йоча тӱня» пайремыште палыме лийынна.

Изиэм годым телевизор дене хоккейым ончаш моткоч йӧратенам. Сандене кум ияшем годым икымше гана коньки ӱмбаке шогалынам. Спортын ты видше чонемлан лишылла чучын, – ойла Дима. – Хоккейым кызыт хоббилан шотлем. Пытартыш жапыште утларак жапым куржталаш ойырем.

Дима – школысо баскетбол командын чолга модшыжо. Куштылго атлетике дене таҥасымашлаште чӱчкыдын сеҥышыш лектеш. Сеҥымаш шондыкышкыжо медаль ден чапкагазше-влак кажне гана ешаралтыт. Тыште физкультурым туныктышо О.В.Зайцеван надырже кугу.