Йошкар-Оласе Патриарший площадьыште эртаралтше «Келшымаш кас» фольклор фестиваль тӱрлӧ кундем гыч толшо, тӱрлӧ ийготан марий-влакым ушен. Тушто йоча-шамычым ужаш поснак куанле ыле. Сценышке лекмекышт, ойыртемалтше вургемышт гыч Свердловск кундем гыч улмыштым вигак палышым.
Красноуфимск олаште илыше да 7-8-ше класслаште тунемше ӱдыр-рвезе-влакым (снимкыште) «Джаз-импровиз» эстраде куштымаш студийыш Е.Г.Илюшкина чумырен.
– Студийышке 150 наре ӱдыр-рвезе коштеш. Йошкар-Олашке латныл изи артистым веле конденам. Ме руш, башкир, татар, одо, мордва калык-влакын куштымашыштым шындена. Мый шкеже марий улам, садлан ушышко трукышто тыгай шонымаш толын: молан марла огына кушто? Яллаште марий ансамбль ятыр уло. Молан олаште марла тавалташ огыл? Тений тиде пашалан пижынна. Шукыштын ачашт але авашт марий улыт, садлан икшывышт верч йывыртеныт веле, – ойла Елена Геннадьевна.
Красноуфимск олаште шуко тӱрлӧ калык ила. Нунын тӱвыраштым, йӱлаштым, эртыме корныштым шымлаш куштымаш полша. Тидын нерген тӱня мучко палышт манын, куштызо-влак тӱнямбал конкурслашке ушнат. Могай гына олалашке, эллашке миен огытыл?! Италийыштат, Францийыштат кушташ пиал шыргыжалын.
– Ме тӱрлӧ калыкын куштымашыжым ончыктена гын, студийлан ончыкыжым «Душа народа» лӱмым пуынена. Нунын тӱвыраштым веле огыл, чоныштым почын пуаш тыршена. Репертуарышкына марий калык куштымашым утларак да утларак пурташ тӱҥалына, – ойла ансамбль вуйлатыше.
Куштымаште – калыкын чонжо
