23-26 мартыште Йошкар-Олаште «Михаил Мурашко йолташыже-влакым ӱжеш» тӱнямбал фестивал-конкурс латикымше гана эртаралтын. Тушко Москва, Рязань, Самара олала, Тюмень область, Краснодар кундем, Марий Эл, Чуваш, Татарстан республикла гыч 48 коллектив, 21 дуэт да шкет куштышо-влак, 11 хореограф-постановщик ушненыт. Нуно 11 таҥасыште мастарлыкыштым ончыктеныт. Кажне коллектив шке сымыктышыж дене палдарен, вес калыкын куштымашыжым ончыктен. Кужэҥер посёлко гыч «Топотушки» калык куштымаш образцовый ансамбль ты фестивальыш ий гыч ийыш ушна. Теният кум куштымашым аклымашке луктын да ончаш толшо калыкын кумылжым нӧлтен. 10-13 ияш-влак коклаште «Припевочки и девичья красота» эстон куштымаш дене икымше степенян лауреат лӱмым налыныт. Ты ансамбльынак участникше Полина Фёдорова «У берега» руш калык куштымашым ончыктен да шкет куштышо-влак коклаште кокымшо лийын. Вуйлатышышт – А.А.Иванова.
– Кеч-могай конкурс але фестиваль усталыкым вияҥдаш полша. Ме шке мастарлыкнам ончыктена, моло коллектив-влак дене палыме лийына, вашкылым ыштена, икте-весе деч тунемына. Куштымашын вийже кугу. Тудо калыкын чонжым, койыш-шоктышыжым, моторлыкшым почын пуа. Сеҥымаш шондыкна кажне ийын пойдаралтеш. Тыште вуйлатышына Антонида Аркадьевнан надырже моткоч кугу, – ойлат ӱдыр-влак.
