Мотор марий тувыран, весела койыш-шоктышан Настя Алембаева Советский район Кужмарий школын 5-ше классыштыже тунемеш. Шочмо йылме ден сылнымутлан шӱман. Кужмара ялысе клуб пеленысе «Эр ӱжара» ансамбльыш коштеш.
– Ты ансамбльыш шольым, мый да авам кажне кастене вашкена. Икмыняр ий ончыч ковамат коштын, – ойла Настя. – Мый изинек ковам пелен лияш йӧратем. Тудын деч тӱрлӧ оҥайым пален налам. Изиракем годым йомакым шуко лудын. Кызыт калык ойпого нерген каласкала. Ковамын ойпогыжым колыштын, почеламут корныла шочын. Тудым «Ковамын уныкажак улам ала-мо…» манын лӱмденам да «Кугезе вож» фольклор фестивальыште мастарлыкемым ончыктенам. Тыршымем арам лийын огыл, икымше верыш лектынам.
Чолга ӱдыр марий писатель, поэт-влакын илыш-корнышт, усталыкышт нерген утларак пален налаш тырша. Марий сылнымутын классикше М.Шкетанын, поэт В.Колумбын произведенийлаштым поснак акла.
Шочмо йылмын, сылнымутын сӧраллыкыштым, кӱлешлыкыштым келгынрак умылаш марий йылмым туныктышо С.П.Комарова полша.
