Ныл йолан йолташым йоча-влак моткоч йӧратат. Пийым але пырысым уремыште ужмеке, тудым ниялташ, кидышкышт налаш вашкат. Тидын годым шагал еҥже орымаш чер (бешенстве) нерген шоналта. Чер моткоч лӱдыкшӧ. Тудо чумыр тӱнямбалне шарлен. Тидын нерген Роспотребнадзорын Марий Эл Республикысе эпидемиологий надзор п ӧлкажым вуйлатыше Анна Олеговна Сысоева дене мутланышна:
– Орымаш чер – тиде инфекций. Тудо черле янлыкын шӱвылжӧ дене кусна. Чаманен каласыман, чодыраште илыше янлык-влак веле огыл, яллаште шала коштшо пий, пырыс айдемылан лӱдыкшым ыштат. Тидын нерген йоча-влаклан умылтарыман. Уремыште коштшо ныл йолан йолташ-влак модыш огытыл. Нуно сырат, пурлын але удыралын кертыт. Черле янлык-влак поснак осал лийыт, орат.
– Орымаш черан пырыс але пий удыралеш гын мом ыштыман?
– Пурлмо верым иканаште шовын дене мушман да пидман. Жапым шуйкалыде, специалист деке полышым йодаш кайыман. Нуно пурлмо верым угыч мушкыт, прививкым ыштат. Антирабический вакцине деч лӱдман огыл. Тудо организмлан нимогай эҥгекым ок ыште.
– Орымаш чер дене черланымым кузе палаш лиеш?
– Пурлмо жап гыч, чер палдырнаш тӱҥалмешке, 10-90 кече але ик ий шуйнен кертеш. Янлык кид, йол, вуй але шӱргӧ гыч удыралеш але пурлеш гын, чер писынрак палдырна. Удырыкта, температур 37-38 градус марте кӱза. Тӧрланаш тӱҥалше сусыр коршта. Шӱлаш йӧсӧ лиеш, укшинчыкта, чытырыкта, шӱвыл йога.
– Шучко чер деч кузе аралалтман?
– Кажне ийын пий ден пырыслан прививкым ыштыктыман. Пийым уремышке нерлык (намордник) дене лукман. Шала коштшо янлык дене кылым кучыман огыл. Шарныза, орымаш чер тӧрланаш лийдыме радамыш пура. Лач вакцинаций айдемын илышыжым арален коден кертеш.
