Башкортостан Республик Краснокам район Коян селасе «Таныптӱр сем» этнофольклор ансамбльыште тӱҥ шотышто коча-кова-влак да нунын уныкашт мурат-куштат, семӱзгар дене шоктат. Ансамбльым 1991 ийыште Ольга Павловна Исинбаева чумырен да тачысе кече марте вуйлата.
– Икмыняр еш, иктеш погынен, йоча-шамычым марий йылме деке шӱмаҥдыме, мастарлыкыштым вияҥдыме шонымаш дене ансамбльым чумырен. Куштымаш, муро гоч марий тӱвырам арален кодаш тыршена. Кумло утла ийыште нылымше тукымым марий койышаным куштена, – ойла вуйлатыше. – Кум-ныл ияш уныкана-шамычым репетицийыш пырля коштыктена. Сценыш изинек лӱдде лекташ туныктена. Ончыкыжым ньога-влак дене эше ик ансамбльым чумыраш шонымаш уло.
«Таныптӱр сем» ансамбльыште эн кугу артист шымле ныл ияш гын, изиракше лу ийым темен. Тиде Арсений Капеев. «Марий мурым колышташ йӧратем. Тӱмырым сайын кырен моштем. Шукерте огыл гармонь дене шке гыч кок мурым шокташ тунемынам. Кажне репетицийыш куанен коштам», – ойла Арсений.
– Мый Коян школын 6-шо классыштыже тунемам, – ешарыш Виктория Давлетбаева. – Ансамбльыш ешге коштына. Ачам – тӱмырзӧ, ковай ден авай куштат, мурат. Мыят нунын пелен тунемам.
Ансамбль тынар жапыште шуко вере лийын. Марий калыкын мурымо-куштымо поянлыкше, пайремым эртарыме ойыртемже, йӱлаж дене палдарен.
