Тӱняште могай гына лӱм уке? Мотор деч мотор, ойыртемалтше деч ойыртемалтше! Но Мариэлла лӱманже кокыт-кумыт веле, очыни. Советский район Кундышӱмбал ял гыч Волковмыт еш ӱдырыштым лач тыге лӱмденыт. Мариэлла Роҥго школышто кумшо классыште тунемеш.
– Пелашем дене тыглай огыл лӱмым пуымо нерген ятыр жап шоненна. Тудым Марий Эл дене кылдаш кумыл лийын. Тыге трукышто Мариэлла лӱм ушыш толын. Документым ышташ кайымеке, загс пашаеҥ-влак моткоч ӧрыныт да тыге маныныт: «Тыгай лӱмым эше нигӧ пуэн огыл ыле». Лишыл да палыме еҥ-шамычланат вучыдымо лийын. Ӱдырнам Ульяна кугезе коваже «Мыйын Марий Элем» манеш ыле, – каласкала ава Наталья Эриковна.
Мариэлла шочмо кундемжым моткоч йӧрата. Кеч-кушко кая гынат, «Мый марий улам. Марий Элыште, ялыште, шочмемлан йывыртен илем» манын, кугешнен, вожылде ойла. Ӱдыр марла мураш, кушташ, марий сценкылаште модаш кумылан. Садлан ача-аваже тудлан мотор марий тувырым ургыктеныт.
– Мый кажне урокыш куанен коштам. Туге гынат эн йӧратымылан марий йылмым шотлем. Мый коча-ковамын, ача-авамын йылмышт дене яндарын кутыраш тунемнем. Тыгай лӱман улам гын, кушкын шумекем, шочмо кундемемым утларак шымлаш шонем, – ойла Мариэлла.
Х.АЛЕКСАНДРОВА.
Н.ВОЛКОВАН фотожо.
