Лудаш темлена

19 мартыште марий серызе, журналист Валентин Исенековын шочмыжлан 90 ий темеш. Тудо Одо кундем Карагӧл район Шопкер ялын эргыже. «Ямде лий» газет редакцийыште коло ий утла пашам ыштен. Юнкор-влакын йолташыже да поро туныктышыжо лийын. Йоча-шамычлан икмыняр сылнымутым пӧлеклен. «Мемнан Мики» ойлымаш сборникше дене палыме лийза.

Н.А.Некрасовын серыме «Дедушка Мазай и зайцы» почеламут М.М.Пришвиным «В краю дедушки Мазая» книгам возаш таратен. Серызе Юл эҥер серысе пӱртӱсым почын пуэн. Михаил Михайлович шошо гыч шыже марте ораван пӧртыштӧ илен, игече вашталтмым, янлыкден кайык-влакым шекланен, ятыр ойлымашым возен.

Серызе А.М.Волков «Волшебник Изумрудного города» повестьшым американ писатель Л.Ф.Баумын «Волшебник страны Оз» йомакше негызеш возен. Кок йомакшат юзо тӱняшке логалше ӱдыр-влак нерген каласкала. Нуно, тӱрлӧ нелылыкым эртен, чын йолташ-шамычым муыт. Ойыртемым шекланен, кок йомакшымат лудаш темлена.

Е.СЕРГЕЕВА ямдылен.