Кажне кундем шке семынже мотор да кумылым савырыше. Тидым шекланен да умылен шуктыман. Йырым-йырысе тӱням шымлаш йочам изинек кумылаҥдыман да туныктыман. Тидым шотыш налын, «Движение Первых» толкын Всероссийский юннатский экспедицийым увертарен. Тушко йолташ-влак, еш дене ушнаш лийын. 30 июнь марте шым тӱрлӧ заданийым ыштеныт. Марий Эл Республикыште илыше-шамычат экспедицийыш ушненыт. Советский район Кельмаксола школышто тунемше-влак Екатерина Беляева, Ева Комарова, Виолетта Трифонова (снимкыште) шочмо кундемыштым шымленыт. Нуным туныктышышт А.Н.Рассолова вуйлатен.
— Тыгай экспедиций моткоч пайдале да кулешан. Йоча-шамыч шочмо верыште могай кушкыл кушмым, янлык илымым, шукш ден копшаҥгым пален налыныт. Аралаш кулмӧ верлаште лийыныт, — ойла Алевтина Николаевна. — «Пуртус аптек» заданий поснак оҥайла чучын. Ӱдыр-влак эм шудо нерген шинчымашыштым пойдареныт. «Пуртус архитектор» заданий почеш Кельмаксола кундемысе эҥер серлам шымленыт. Умдыр илыме верым, тудын «уста чоҥышо» улмыжым эскереныт. Мемнан кундемыште Йошкар книгаш пуртымо кушкыл-шамыч огыт куш гынат, шочмо вер эн лишыл.
Ӱдыр-влаклан «Проект паша» заданий эн нелыла чучын. Нуно «Закольцованная экотропа» маршрутым ыштеныт. Тудо 2 километр кутышан, кеҥеж пагытлан келыштарыме. Школ кудывече гыч тӱҥалын, корнышт Шуда-Сола эҥер деке шуйна, пӱнчерлаш савырнат, плотинам эскерат, тушеч «Лудо отро» йӱштылмӧ верыш куснат. Тыге шочмо кундемысе сылне верлам авалтат. Тиде маршрут почеш ончыкыжым йоча-шамычым экскурсий дене коштыкташ шонат.
— Мыланна экспедиций пеш келшен. Шочмо кундем деке утларак лишеммыла чучын, — ойлат ӱдыр-влак. — Налме шинчымашым илышыште кучылташ тунемына да пуртусым шымлаш кумылаҥына.
Людмила ГРИГОРЬЕВА.
Фотом школ архив гыч налме.
