Сад-пакчаштына олмапу, грушо, сливе, вишне, эҥыжвондо да молат кушкыт. Тидлан ме тунемынна. Но южо вере кечывалвелысе кушкылымат ужаш лиеш: абрикосым, алычам, виноградым. Мыланем абрикосым куштымо нерген пален налаш оҥай ыле, садлан «Сад Мари» питомникын тÿҥ специалистше М.И.Рябинин (снимкыште) дене кылым ыштышым.
– Михаил Иванович, абрикосым Марий Элыште кеч-кушто шындаш лиеш? Мом шотыш налман?
– Такшым республикыштына чыла вере шынден кертыт, но кÿкшакарак вер кÿлеш. Йÿштым чытыше сортым, мемнан кундемлан келшышым ойырыман. Йÿдвел мардеж логалшаш огыл. Шуко урлык абрикос йÿштым чыта, но телым кужу жап леве игече шогымо годым вÿдыжген сеҥа. Тиддеч утлаш манын, абрикосым сливе але тёрн вондыш шуяш келшен толеш.
– Мланде (почво) могай лийшаш?
– Абрикослан куштылго, пушкыдо, тÿрлӧ химический веществалан поян мланде кÿлеш. Шындышаш лакым 2-6 тылзе ончычак ямдылаш гын, сай. Саскан пушеҥге неле, шунан, шопо рокым ок йӧрате. Абрикос ошман мландыште сайын кушкеш. Кушкылым шындымеке, тÿткӧ лийман. Йÿр ок йÿр гын, арнялан 2-3 гана вÿдым шавыман. Шыже велеш шындеда гын, август-сентябрьыште вÿдым «йÿктыман», шошым гын – апрель-июньышто. Июльышто шагалрак шавыман, а сентябрьыште чарныман. Тунам пушеҥге телылан ямдылалташ тÿҥалеш. Ты темлымаш-влакым шотыш налаш огыл гын, ок илане.
– Тысе абрикос кечывалвел кундемысе деч тамже дене ой ыртемалтеш мо?
– Там дене нуно огыт ойыр темалт, манаш лиеш. Тора гыч кондымо абрикосым, толын шумешкыже ынже локтылалт манын, пелегÿшым погат. А шке пакчаште ончен куштымо абрикосын кÿмыжым ончен поген кертына. Сайын шушо саска пеш чот тамле! Садлан кечывалвел пушеҥгым шындаш ида лÿд.
Христина АЛЕКСАНДРОВА мутланен.
Фотом питомникын архивше гыч налме.
