Кеҥеж канышым ончыде, Медведево районысо Руэм школ мўкш омартала гўжла. Школ кудывечысе йўк-йўан торашке шергылтеш. Ӱдыр-рвезе-влак пеледыш клумбышто шўкшудым сомылат, пушкыдемдат, вўдым шават. Тиде экологий отряд тўҥ сомылжым шукта. «Экологий отрядын ик сменыже вич кече шуйна, вара мемнам вес йоча-влак алмаштат, – ойла 6-шо классым тунем пытарыше Тимур Юркин. – Туныктышо-влак Татьяна Ильинична Долгорукова ден Ангелина Михайловна Никитинан вуйлатымышт почеш тўрлӧ пеледышым, кушкылым шымлена». Тораштак огыл вес йоча тўшка пареҥге йыраҥлам тарватылеш. Школын шке пакчаже уло. Тушто пареҥгым, кешырым, шоганым, йошкарушменым да молымат ончен куштат. 5-8-ше класслам тунем пытарыше икшыве-влак пакчаште кеҥеж мучко черет дене тўрлӧ сомылым ыштат.
Теве школ гыч сылне мурсем йоҥгалте. Туштыжо мо тыгай?
– Школ пеленысе «Планета дружбы-2021» йоча лагерьысе ўдыр-рвезе-влак жапыштым тыге веселан эртарат, – палдара лагерь вуйлатыше А.В.Актанаева. – Тушко 1-4-ше класслам тунем пытарыше 120 йоча коштеш. Лагерьыште 6 отряд уло: кажнын – шке лўмжӧ, мурыжо, ўжмашыже. Лагерьыште тўрлӧ кружок пашам ышта. Икшыве шкалан келшышым ойырен кертеш. Кажне кече оҥай мероприятийлан поян. Рўдоласе тўрлӧ театрыш, Медведево посёлкысо зоопаркыш миенна.
Руэм школышто 800 утла ўдыр-рвезе шинчымашым пога. Тунемше да туныктышо коллективым директор Ю.А.Харужина моштен вуйлата. Сандене школ илыш идалык мучко мўкш еш гай гўжла. Йоча-влак уш-акылым пойдарат, пашалан тунемыт да ончыкылык илышлан ямдылалтыт.
Л.ГРИГОРЬЕВА.
