Волжский район Руш Шайра ял воктене верланыше Мӱшылъер нерген «Семь чудес России» конкурсыш ушнымыж деч вара шукын пален налыныт. Тудын моторлыкшым ончалаш, каналташ кушеч гына толын огытыл? Шукерте огыл Интернетыште ерыште вӱдын иканаште икмыняр метрлан волымыж нерген вучыдымо уверым ужна. Тудын пӱрымашыже верч верысе калык веле огыл, пӱтынь Россий азаплана. Молан тыге лийын? Умбакыже мом вучыман? Нине йодыш-влаклан вашмутым муаш манын, верысе краевед М.Ю.ТИМОФЕЕВА дене мутланышна:
– 2010 ий гыч ерыште вӱд шагалемаш тӱҥалын. 2014 ийыште иканаште иземын, 2016 ий шошым ик жаплан шукемын. 2019 ий гыч вӱд эркын-эркын «каяш» тӱҥалын. Тений 2 февральыште Руш Шайра ял калык кугу йӱкым колын. Ерысе ий сӱмырлен, эсогыл пӧртысӧ окна-влак чытырналтыныт. Пале лийын, вӱд «шылын».
– Марина Юрьевна, вӱдын волен кайымыже мо дене кылдалтын?
– Йӱр чот толмо годым вӱдым чодыраште лышташ шартыш але регенче куча гын, курыкан кундемлаште коремышке але эҥерышке йоген кая. Сотнур кундемыште икмыняр ий ончыч йӱр але лум вӱд Шайра, Пеза изи эҥерла дене Элнетышке йоген каен. Кызыт нине йогын-шамыч кошкеныт але куштыра, шудо дене петырненыт. Садлан вӱд мландышке шыҥа да южо породым шулдара. Яра верлашке мланде йымалне улшо эҥер-влак йоген пурат, да кумдык эшеат кугемеш. Мӱшылъер мланде порволымо йӧн дене шочшо ерлан шотлалтеш. Моло ер дене таҥастарымаште Мӱ-шылъерысе вӱдын уровеньже кӱшнырак лийын. Очыни, мланде йымалне улшо эҥер-влак дене тудо начаррак кылдалтын улмаш. Но, жап эртымеке, ер пундашысе йошкыным вӱд мушкын. Тыге вӱд йоген каяш тӱҥалын.
– Ончыкыжым мом вучыман?
– Вӱдын уровеньже моло ер дене тӧреммешке иземаш тӱҥалеш. Ерым йомдарыме огеш шу. Мо лиеш? Жап ончыкта.
