Башкортостан Республик Бирск район Суслово школын 6-шо классыштыже тунемше Виктория АХМАДЕЕВА изинек чолга кушкеш. Сайын тунемеш, сӱретлаш кумылан, баскетболла модеш. Кушталтен колта гын, чылт лывыла коеш. Мотор ал тӱсан тувырым Викториялан аваже лӱмын ургыктен. ™дыр тыгай сылне вургем дене сценышке чӱчкыдын лектеш.
– Авам Изи Соказа селасе клуб пелен «Рвезылык» йоча ансамбльым вуйлата. Мый тушко куанен коштам. Туштак марий муро да куштымаш деке шӱмаҥынам, марий шӱлыш чонышкем эрелан шыҥен. Куштымаш калыкын илышыжым, кумылжым почын пуаш полша. Ме тидым калык деке намиен шукташ тыршена, – ойла Виктория.
