Кужэҥер район Шӱдымарий школышто тунемше-влак София Петухова ден Яна Афанасьева (снимкыште) тӱрлӧ классыште шинчымашым погат гынат, сай йолташ улыт. Коктынат шочмо марий йылмым куанен тунемыт, конкурслашке ушнат. Ӱдыр-влак почеламутым сылнын лудаш йӧратат. «Колумб лудмаш» регион-влак кокласе сылнымут пайремыште нунын дене палыме лийынам. София шке возымо почеламутшым лудын, Яна – В.Крыловын «Пеледыш пайремжым». Коктынат сеҥыше-влак радамыш лектыныт. Нуным таҥасымашлан школышто марий йылмым да литературым туныктышо М.Н.Савельева кумылаҥда. Ӱдыр-влак Маргарита Николаевналан таум ойлат.
– Туныктышына «Кажне айдеме шочмо йылмыжым йӧратышаш, пагалышаш, тудым куанен тунемшаш. Тунам тукымна виян да поян лиеш» манын ойла. Тиде ушан ойсавыртышым ушыштына кучена, – ойлат София ден Яна. – Шочмо марий йылмын сылнылыкшым почеламут корныла гоч почын ончыктена.
Е.ИВАНОВА.
Авторын фотожо.
