Вич ияш Таисия Ялаева Йошкар-Оласе 51-ше номеран «Подсолнушек» йочасадыш коштеш. Изинек марий шӱлышан кушкеш. Ешыште марла йомакым лудыт, изирак почеламут-влакым наизусть тунемыт. Мастарлыкшым «Колумб лудмаш» оласе конкурсышто ончыктен. Тиде Таисиян икымше таҥасымашыже лийын. Сеҥышыш лектын огыл гынат, кумылжо волен огыл. Сылне марий тувырым чийымыжлан моткоч йывыртен. «Мыланем почеламутым марла ойлаш келшыш. Йоча-влакше тыгай сылнын лудыт! Весканат конкурсышко ушнаш кумылем уло. Мый ковам деке унала чӱчкыдын коштам. Тудо марла кутыраш туныкта. Шочмо йылмым эше сайынрак тунемаш тӱҥалам», – ойла Таисия.
