Куд ияш Алёша кеҥеж мучко коча-коваж дене ила. Кӱтӱ черет шумеке, коважлан кӱтӱш кочаж деке кечывал кочкышым нумалаш полша.
Ты ганат Алёша коваж пелен кӱтӱшкӧ тарваныш. Тушто кочаже вольыкым ӱмылан верыш иквереш чумыренат, курык чоҥгаш кечывал кочкышым вучаш лектын шинчын. Курык чоҥгаш миен шумеке, кова вольыкым эскераш кайыш. А Алёша кочаже пелен кочкаш шинче.
– Кунам ынде, Алёша, пеленем кӱтӱш кошташ тӱҥалат? – кочмо кокла гыч кочаже йодо.
– Ондак кӱтӱчӧ семынак сайын кочкаш тунемаш кӱлеш, – чолган вашештыш уныка да шылан пучымышым совла дене кугунрак коштале.
