Илен улмаш Мераҥ. Тудо чыла деч лӱдын, сандене йолташыжат лийын огыл. Икана Мераҥ Шоҥшым тошкалын.
– Шоҥшо тос, нелеш ит нал. Мый йоҥылыш тошкалынам.
– Нимат огыл, сусырген омылыс, – пелешта Шоҥшо.
Тиде жапыште аланыш Пире кудал толеш. Пе-е-ш шужышо.
– О-о-о, ынде мӱшкырем темем, – куанен пелешта Пире.
Мераҥ куш пурышашым ок пале, туртын веле шинча. Шоҥшо мундырала пӱтырна да Пире ӱмбак тӧршта. Пирын капшым иканаште шӱдӧ име шуралта. Чодыра гыч тыманмеш шикшалтеш.
Тиддеч вара Мераҥ ден Шоҥшо келшаш тӱҥалыныт.
Лев МАЛИНИН.
Волжский, Пӧтъял.
