5 июньышто Йошкар-Оласе Тӱвыра да каныме паркыште Йочам аралыме кечылан да Шочмо элым аралышын идалыкшылан пӧлеклалтше «Йоча пеледыш пайрем» эртаралтын. Мероприятийыш Морко, Советский, Шернур, У Торъял, Килемар районла да Йошкар-Ола гыч 9 команде ушнен.
Йӱлам жаплена
Пеледыш пайремын поро йӱлаже – таҥошкылмаш. Йоча-влак Палыдыме салтаклан шарныктыш воктеч рӱдӧ паркын эстраде аланже марте марий семӱзгар сем почеш ошкылынат. Сарзе еҥ-шамычым шарналтен, Воин чап да Курымашлык тул монумент воктеке пеледышым пыштеныт.
– Йоча пеледыш пайрем – мотор кеҥеж пайрем. Тышке шочмо йылмым палыше да аклыше, марий улмышт дене кугешныше ӱдыр-рвезе-влак погыненыт, – палемдыш Марий Эл Кугыжаныш Погын Председательын икымше алмаштышыже Лариса Яковлева.
Кече веселан эртен
Марий модыш-влак уш пӱсылыкым, кап писылыкым вияҥдаш полшат, икте-весе коклаште кылым пеҥгыдемдат, весела кумылым луктыт. Нуным самырык-шамыч палышаш, тукым гыч тукымыш арален кодышаш улыт. Ты шонымаш денак организатор-влак ятыр модмашым ямдыленыт, туштым туштеныт. Теве Морко район Коркатово лицейын «Айвика» командыжлан «Оҥго дене модмаш» келшен.
– Мыланна онгыш шогалаш темленыт, кидышкына кугу тоям кучыктеныт. Шотлымо почеш, шке тоям шогалтен коден, весыным кучен шуктыман. Кєн камвозеш – сеҥалтеш. «Писе йыдал», «Шӧртньӧ капка», «Оҥго дене модмаш», «Пикш дене лӱйкалымаш» модыш-шамычат оҥай лийыныт, – палдарышт ӱдыр-влак.
Пайремын ик весела ужашыже – армрестлинг таҥасымаш. Ӱдыр-шамыч коклаште эн виян У Торъял район Тошто Торъял школ гыч Софья Басова лийын. Рвезе-влак коклаште икымше верым Килемар район Арде школын тунемшыже Андрей Кириллов налын.
Эх, кертыт вет!
Могай пайрем мурымаш да куштымаш деч посна? Мероприятийыш ушнышо-шамыч сылне номерым ямдыленыт. Теве У Торъял район Тошто Торъял гыч «VOICE» вокал ансамбль калыкым «Рышт-рошт тавалтем» муро дене куандарен.
– Мый ансамбльыш 5-ше классыште тунеммем годым ушненам. Сценыште выступатлаш моткоч йӧратем, – ойла Диана Тойбахтина.
Чолга йочалан – чапкагаз
Ты мероприятийыш школышто сайын тунемше, тӱрлӧ конкурсышто ойыртемалтше, СВО-што улшо сарзе еҥ-влакын икшывышт ушненыт. Шкем чолган ончыктышо ӱдыр-рвезе-шамычлан чапкагазым кучыктеныт. Кажне командым номинаций дене палемденыт. Шернур район Койсола школын «Шонанпыл» командыже «Эн ойыртемалтше» лийын.
– Таҥошкылмаш, концерт, модмаш, шовын шӱвыроҥ шоу – мыланем чылажат келшен. Ты пайремыш толмемлан моткоч йывыртенам. Мыланна шере пӧлекым кучыктеныт, мороженый дене сийленыт, – палдарыш ты командын ик чолга ӱдыржӧ Варвара Шабалина.
Оля МАЙКОВА.
Катя СЕРГЕЕВАН да авторын фотошт.
