«Толза муро памашем воктек», — тыге серен ик почеламутыштыжо уста поэт Валентин Колумб. Чынжымак, пуйто тудо ончыкылыкым ужын моштен да, кодшо курымысо 80-ше ийлан икымше пелыж гыч тӱҥалын, калыкым муро памашыж дек ий еда чумыра. Тений «Колумб лудмаш» регион-влак кокласе сылнымут да мурсем фестиваль-конкурс Валентин Христофоровичын шочмыжлан 90 ий теммылан пӧлеклалтын.
Тӱрлӧ кундем — тӱрлӧ лудшо
26 июньышто Морко район Волаксолаште эртаралтын. Пайремышке Морко районысо тӱрлӧ школ, Советский, Шернур, Звенигово, Волжский, У Торъял, Параньга районла, Йошкар-Ола, Татарстан Республик Арск район гыч шӱдӧ утла участник ушнен. Нуно В.Колумбын сылнымутшым марла, рушла да йот йылмыла дене лудыныт. Поэтын мутшылан возымо муро-шамычым йоҥгалтареныт. Шке гыч возымо почеламутым лудшо-шамычат, мурым мурышо-влакат лийыныт.
— Валентин Колумбын лӱмгечыжлан пӧлеклалтше пайремым эртараш ий мучко ямдылалтынна. Икымше мероприятийым поэтын шочмо кечынже, 3 майыште, Пумыр ялыште эртаренна: бюстшо воктеке пеледышым пыштенна, уна-влакым ӱжынна, — ойла Морко районысо клуб системе вуйлатышын инноваций да методике паша шотышто алмаштышыже Л.Ф.Кириллова. — Йӱлаш пурышо фестиваль-конкурсышко ушнышо-шамыч кажне ийын ешаралтыт. Тугеже калык Валентин Колумбын усталык корныжым шымла да пагала.
Эн уста — сеҥыше
Конкурсышто тӱрлӧ ийготан йоча, кугыеҥ-шамыч усталыкыштым ончыктеныт. Удыр-рвезе-шамычлан Колумбын «Йӱд кушто ила?», «Шояк Павыл», «Йӱдын кидше могай?» почеламутшо-влак поснак келшат. Кажне участник уста лийын гынат, конкурсышто сеҥышым палемдат.
7 ияш марте лудшо-шамыч коклаште Морко район Купсола школышто тунемше Дарина Чиркова ден Йошкар-Оласе 65-ше номеран йочасадыш коштшо Давид Петухов сеҥышыш лектыныт. Рушла лудшо-влак коклаште София Христофорова (Йошкар-Ола, «Канде кайык» гимназий) ден Елизавета Александрова (Йошкар-Ола, 55-ше номеран йочасад) чылам ончылтеныт. Диана Ягодарова (У Торъял районысо клуб системе) муро таҥасыште сеҥен. 8 гыч 10 ияш марте лудшо-влак коклаште Анастасия Романова (Морко, Купсола) ден Анна Романова (Национальный сымыктыш гимназий) икымше верыш лектыныт. Почеламутым рушла лудмаште ты гимназийыштак тунемше Евдокия Бородова сеҥыше лийын. Муро таҥасыште Мария Тюрина (У Торъял районысо клуб системе) ойыртемалтын. Ульяна Герасимова (Волаксола), Виктория Николаева (Зеленогорск), Мария Николаева (Морко, Энерсола), Регина Григорьева (2-шо номеран Морко школ). 11-14 ияш-влак коклаште тӱрлӧ таҥасыште сеҥышыш лектыныт. 1-ше номеран Морко школышто тунемше Ксения Дмитриевам поснак палемдыман. Чаткан, раш, чылт артист семын лудмыж дене кажне еҥын кумылжым савырен. 15-18 ияш-шамыч коклаште икымше верым сеҥен налын. Родион Небогатиков (У Торъял, Токтарсола) ден София Сенькина (Морко, Октябрьский) шке возымо почеламутышт дене ойыртемалтыныт. Равиль Игнатьев (Йошкар-Ола, 3-шо номеран школ), София Сенькина муро пӧлекышт дене сеҥышыш лектыныт. «Колумб лудмашке» еш денат ушнат. Тидыже куандара. У Торъял район Токтарсола гыч Небогатиковмыт еш (снимкыште) теният икымше верым сенен налын. Поэзий пайрем тӱрлӧ ийготан калыкым иквереш чумырен. Валентин Колумбын сылне мутшо йырваш йоҥген. Тек ты поро йӱлан ӱмыржӧ кужу лиеш.
Людмила ГРИГОРЬЕВА.
Авторын фотожо-влак.
