8 август — пырысын тӱнямбал кечыже.
Эртыше ийын йочасадыште «Ме тыйын йолташет улына» кружокым вӱденам. Икшыве-влак дене пырыс нерген идалык мучко кутыренна. Тӱрлӧ урлыкым таҥастаренна, шымлымашым ыштенна. Йоча-шамыч шке сурт янлыкышт дене куанен палдареныт. Теве Раиль Козлов леопардла койшо Кичи лӱман сурт янлыкшым моткоч йӧрата. Рвезе кружокысо йолташыже-влаклан тыгай уверым ямдылен: «Тӱнямбалне 600 миллион наре пырыс ила. Ик ассоциацийын уверже почеш, 72 урлык уло». Вика Костроминат ныл йолан йолташыже нерген каласкален да ешарен: «Кугурак ийготан-влак суткаште 16-20 шагат мален кертыт. 100 тӱрлӧ йӱкым луктын моштат». Российыште пырысын кечыжым 1 мартыште палемдат. 2002 ий гыч пырысын тӱнямбал кечыжым 8 августышто пайремлаш тӱҥалыныт.
Надежда ГОДУНОВА.
Фото-влакым йочасадын архив ше гыч налме.
