Иван СМИРНОВ, Россий Федерацийын сулло, Марий Эл Республикын калык артистше:
– Пионер илыш эн волгыдо пагыт семын шарналт кодын. Иза-акам-влак пионер лийыныт. Нуным ончен кугешненам. Сайын тунемаш, чолга, ончылно лияш тыршенам. Пионер радамыш ушнымо тат нигунам огеш мондалт. У Торъял район Тушнур школышто тунеммем годым йошкар галстукым шўйышкем кылденыт. Тӱмырым перкалаш, горным пуалташ моткоч йєратенам. А пашаш тӱшкан коштмаш пайремла чучын. Ме шудым соленна, удыренна. Колхозлан ковыштам, кешырым поген налаш полшенна. Тылеч посна макулатурым, пӱгыльмым, ломыжым погенна, чодырам эрыктенна. Паша мемнам илаш, ончыко ончен мошташ туныктен. У Торъял школын пионервожатыйже Татьяна Степановна Бирюкова пеш чолга ӱдырамаш ыле. Ме тудын дене кугешненна да тудын гай лияш тыршенна.
