Пӱртӱс вашталтмым, кайык, янлык-влакын илышыштым шымлаш изинек тунемман. Чылажымат тӱткын эскерен моштыман. Шанчызе-влакын терминышт дене ойлаш гын, фенологий эскерымашым эртарыман. Мутлан, шошым тӱрлӧ кайыкын чоҥештен толмыжым эскерен, дневникеш палемдыман. Кажне ийын толмо жапышт вашталтеш. Тиде сомылым ышташ мыйым авам туныкта. Изирак кайык-влакым эскераш нелырак: нуно икгай койыт. Садлан кид йымалне бинокль але сӱретым кугемден кертше фотоаппарат лийшаш. Кугу кайык-влакым эскераш куштылгырак. Мыланем вӱдыштӧ ийын коштшо кайык-влак келшат. Йӱксӧ да чарлаҥге мужыр-влакым войзен кертынам. Тыгак олача-вулача, ужар, шем шиште-влакым ужынам. Нуно чодыран санитарже улыт.
Йоча-влак, теат эскерен ончыза. Пӱртӱс – шкешотан да оҥай тӱня.
Давид ТИМОФЕЕВ.
Волжск, 2-шо номеран школ.
