У Торъял район Тошто Торъял школышто спортлан кугу тӱткышым ойырат. Физкультур урокым Е.И.Широбокова эртара. Тренер-туныктышо И.П.Хлыбовын (снимкыште йоча-влак дене пырля) ӱдыр-рвезе-влакым шуарымаште да спортлан шӱмаҥдымаште надырже пеш кугу. Иван Петрович тиде школышто 15 ий пашам ышта, ече дене секцийым вӱда.
– Йоча-шамыч куржталаш, ече дене кошташ, футболла, волейбол, баскетбол дене модаш кумылан улыт. Ечылан да куштылго атлетикылан веле тӱткышым ойырет гын, ӱдыр-рвезе-влаклан йокрок лиеш, шонем. Нуным очко дене «ондалем». Тренировкыш толыт – очком сулен налыт. Тренировкышто мыняр меҥгым куржыт, тунар балл. Школын чапшым районышто але республикыште аралат, эше шукырак шындем. Эн шуко очком погышо ӱдырлан да рвезылан тунемме ий мучаште грамотым, медальым да кубокым кучыктена, – ойла тренер.
Тиде йӧнын лектышыже куандарыше. Икмыняр тале спортсменым поснак палемдыман. Ульяна Кулагина куштылго атлетикылан шӱман. Чыла гаяк таҥасымашке ушна да сеҥышыш лектеш. Кирилл Ключев спортын тӱрлӧ видше дене ончылно: куржталеш, ече дене коштеш, футболла, волейбол, баскетбол дене модеш. Настя Яндыганова, Софья Басова, Никита Иванов сеҥымашышт дене куандарат. Нине ӱдыр-рвезе-влак У Торъял районышто куштылго атлетике дене командный первенствыште шукерте огыл икымше верым сеҥен налыныт. ГТО нормативым сдатлымаштат сай лектышым ончыктат.
– Спортын пайдаже нерген йоча-шамычлан эре ушештарем. Рвезе-влаклан посна умылтарем, вет нуно ончыкылык салтак улыт. Школ директор Иван Николаевич Ельмекеевлан полшен, кумылаҥден шогымыжлан – кугу тау, – ойла Иван Петрович.
