Йоча ош тӱняшке пиалан лияш шочеш. Но кажне икшывылан ача-аван шокшо помышыштышт йӧратымашым шижын илаш пӱрен огыл. Кызыт Морко район Кӱчыкэҥер ялыште илыше Вика, Миша ден Алёшалан ача-ава пелен лияш пиал шыргыжалын. Нуным Маргарита Георгиевна ден Лев Владимирович Гавриловмыт ашнаш налыныт.
Юарлыме йӱк ситен огыл
Маргарита Георгиевна Морко посёлкысо эмлымверыште йоча консультацийыште участковый медшӱжарлан пашам ышта. Шке икшыве-влак кушкын шумеке, суртышто йоча юарлыме йӱк ситен огыл. Вате-марий икшывым ашнаш налаш кумылаҥыныт.
– 2015 ийыште изи падыраш ӱдырым, Викам, мӧҥгӧ конденна. Вика гаяк ийготан Мишам тиде ийынак Морко посёлкысо эмлымвер гыч налынна. Рвезын эше Алёша изаже улмым пален налмеке, тудымат ойырен огынал. Еш – тиде мыланна чыла, йоча – тиде илыш. Нине икшыве-влаклан шкенанак улыда манын умылтарена, – ойлат вате-марий.
Икшыве-влак Купсола школышто тунемыт. Алексей 6-шо классым тунем пытарен, Миша – икымшым, Вика – кокымшым. Кумытынат поро кумылан, чолга, икте-весым умылен моштышо да полышкалыше кушкыт. Алёша спортлан шӱман. Школысо футбол да туризм секцийлашке коштеш. Яра жапыште колым кучаш йӧрата. Шольыжымат тиде пашалан кумылаҥден. Вика шӱжарышт усталык шӱлышан кушкеш. Морко посёлкысо тӱвыра полат пеленысе «Рвезылык» ансамбльышке кушташ коштеш. Тылеч посна мураш тунемеш. ™дыр-рвезе-влак поделкым ышташ йӧратат. Икте, мутлан, пеледышым ямдыла гын, чыланат пашалан пижыт. Кажныже пӱчкын, пижыктен онча.
Сочиште каненыт
Гавриловмыт пӱртӱсым шымлаш йӧратат. Шочмо верысе тӱрлӧ сылне верыште лийыныт. Карман курык эн чот келша. Чӱкшӧ курыкыш лишыл жапыште миен толаш шонат. Тений шошым ӱдыр-рвезе-влаклан Сочи оласе санаторийыште канаш пиал шыргыжалын. Тушко Морко район гыч лу йоча миен. Индешынже ашнаш налше ешла гыч лийыныт. Нуным Маргарита Георгиевна намиен коштыктен.
– Санаторийыште йоча-влак дене пырля кум арням пеш веселан да пайдалын эртаренна. Тудо экскурсийлан поян лийын. Олимпийский, «Ривьера» тӱвыра да каныме парклашке, аквариумышко, Роза Хуторыш, чай плантацийышке, самовар тоштерышке, сафари-паркышке да моло вереат миенна. ™дыр-рвезе-шамычлан мурышо фонтан пеш келшен. Тюльпан пушеҥге ӧрыктарен. Чыланат куан дене темше, пиалан пӧртылынна, – ойла чолга ава.
Гавриловмыт «МариЯ» ашнаш налше еш-влакын ассоциацийышт дене пеҥгыде кылым кучат. Тудын эртарыме мероприятийлашке, конкурслашке ушнат. Моло еш-влак дене палыме лийыт, пырля канат. «Принимающая семья, или Семья вместо детского дома» социальный фестивальыште таҥасеныт да, «В кругу семьи» видеоролик конкурсышто эн шуко йӱкым поген, сеҥыше радамыш лектыныт.
Икшывыже – район мучко
Маргарита Георгиевна шке икшывыже верч веле огыл, моло йоча-влак верчат тургыжлана. Тудо Морко районышто ашнаш налше еш-шамычын «Родник» клубыштым вуйлата. ™дыр-рвезе-влаклан тӱрлӧ мероприятийым, пайремым эртара. Тылеч посна пожарный частьышке, киндым пыштыме комбинатышке, рушарня, музыкальный школлашке экскурсий дене миеныт.
– Йоча-шамыч шукырак ужышт, шукырак палышт манын, чыла ышташ ямде улына. Ме огыл гын, кӧ нуным пиаланым ышта?! – ойла поро кумылан ӱдырамаш.
