31 октябрь гыч 2 ноябрь марте Йошкар-Олаште XII Марий калык погын эртаралтеш. Делегат-влак Российын тӱрлӧ кундемже гыч толыныт. Нунын коклаште «Ямде лий» газетын ончычсо юнкоржо-шамыч шагалын огытыл. Икмынярышт деч кок йодышлан вашмутым пуаш йодна:
1.Илыш корныштыда йоча газетын вержым кузе акледа?
2.Марий тӱняште могай йодышым эн пӱсылан шотледа?
Э.В.ЗАХАРОВА, Россий Федераций общий образованийын почётан пашаеҥже, Параньга район Яҥгетсола тӱвыра пӧртым вуйлатыше.
- Кузе лудаш-возаш тунемынам, шарнем, эре «Ямде лийым» вучем ыле. А вара шкеат возаш кумылаҥынам. Тӱрлӧ ребус, викторине, йомак, конкурс-шамыч поснак келшеныт. Шарнем, 7-ше классыште тунеммем годым шочмо кундемысе вершӧр лӱм-влак нерген легенде ден преданийым чумырен, ончыл верыш лектынам. Шӱдымарий школышко (шочмо кундемем – Кужэҥер район Нуръял) «Ямде лий» газет редакций гыч лӱмын толын, «Смена-8» фотоаппаратым кучыктеныт. Тудо жапыште пеш чапле пӧлек лийын. Тиддеч вара газет деке утларак шӱмаҥынам. Жапше годым журналист лияш шоненам, но пӱралтын огыл улмаш… Параньга район Матародо школышто пашам ыштыме годым юнкор кружокым эре вуйлатенам. Самырык годсо шонымашем деч тораште лийын омыл, газет дене эре кылым кученна. Йоча-влакын пашашт чӱчкыдын савыкталтын. «Ямде лий» – мыйын йолташем, туныктышем. Тудо мыйым моло газет деке лишемден да кунамже шкешотан шымлымаш пашаланат туныктен. Кызытат лаштыклаш йӧратем, но шукыж годым интернет гоч. Пашаштемат мотор почеламут-влакым кучылтам. Очыни, изи годсек «Ямде лийым» йӧратен шуко лудмем йылмем лывырташ полшен. Вет шочмо йылмем, марий йӱлам пагалымем туныктымо пашаште веле огыл, кызыт тӱвыра пӧрт вуйлатыше семын тыршымаштат кугу полыш.
- Марий тӱняште, мыйын шонымаште, эн тургыжландарыше йодыш – тиде шочмо йылмына. Марий йылмына тӱлыжга – калыкнан ончыкылыкшо йомеш… Кумда Российыштына шагал чотан калык-влак аралалт кодышт манын, ты йодышым федерал кӱкшытыштӧ пеҥгыдемдыман, очыни.
