Кӧ тыгай жокей? Тиде имньым кушкыжын кудалыштше, тудын дене таҥасымашке ушнышо еҥ. Медведево ипподромышто ончыкылык жокей-шамычым изинек ямдылат. Тидын нерген директор, Марий Эл Республикысе жокей клубын председательже В.Л.Шабалина дене мутланышна.
– Имне – ку-гу вольык. Йоча-влак тудын деке иканаште лишемаш лӱдыт. Имне дене «йолташ» лияш манын, мом ышташ кӱлмӧ нерген ончылгоч умылтарена. Сакырым, олмам пуат, ниялтат. Уто йӱк-йӱаным огыт лук, огыт куржтал. Эн ончыч имньым шӧрмычкыл дене вӱден коштыктат. Тунем шумеке кушкыжыт, – ойла Вера Леонидовна.
Жокей шлемым, рединготым (пиджак), ридингым (кӱкшӧ таганан йолчием), ош бриджым, парняшан пижым чийышаш. Ты-гай вургем дене таҥасымашлашке ушнат. Выездке, конкур (тӱрлӧ чарак, кӱкшыт) дене вийыштым тергат. Таҥасымашлан имньымат моткоч ямдылат. Мутлан, тракенский урлык тӱрлӧ чарак гоч тӧрштылеш, чистокровный верховой писын кудалеш.
Медведево ипподромышто ямдылалтше ик эн тале ончыкылык жокей-влак кокла гыч Яна Медведевам, Яна Спиридоновам, Яна Яроцкаям палемдаш лиеш. Нуно Гранд Юпитер, Юлани Фэлон имньышт дене ятыр таҥасымаште сеҥышыш лектыныт.
– Имне дене кылым мумеке, ӱдыр-рвезе-влак нунын дене курымешлан йолташ лийыт. Арулыкым эскераш тунемыт. Пашаче, чытыше, лӱддымӧ, писе улмышт дене ойыртемалташ, капыштым тӧр кучаш тӱҥалыт. Имньым кычкен кудалыштмаш тупрӱдылан кугу пайдам ышта, – ойла Вера Леонидовна.
